小弟第一本實體小說---《後香港小男人網上日記》即將出版，更請來可正兄 (《男人唔可以窮》作者) 寫序, 及陳順康老師繪畫封面，希望大家到時多多支持~!
《出書啦！》
各位讀者朋友，唔經唔覺《後香港小男人週記》已經誕生咗一整年啦！
回想故事連載期間，能夠得到唔少朋友認同，實在令小弟受寵若驚。响連載三十幾個星期之後，隨住阿賓得到幸福，故事亦完滿結束。其間受到外界注意，實在有賴大家支持。小弟經過反思如果無咗一眾讀者，根本就唔會有人留意區區一個宅男响網上寫嘅嘢。亦因為有大家，小弟先有動力一寫再寫。
所以，每一位曾經讚好或留言嘅朋友，都係令呢個故事受歡迎嘅持份者。真係感激各位！
今日，小弟想向大家報告一件事：《後香港小男人週記》會响今年出版。由於考慮到版權問題，書名會略作修改為《後香港小男人網上日記》。
有人問過小弟點解完結咗大半年先出版？
其實，小弟有將「分享」呢個概念同幾間出版社傾，起初真係唔太順利。點知一個機緣巧合，終於找到跟小弟意念一致嘅「墨出版」（即高登神作《男人唔可以窮》的出版社）。出版社更承諾日後任何出版故事都會先响網上跟大家分享，再原封不動去出版（有改錯字嘅）。對於出版社同小弟，無疑利潤係可能大減，但係我地深信無網上讀者，就唔會有受歡迎嘅故事。而好嘅故事會得到讀者買書支持，呢種將會係日後嘅潮流。難得墨出版眼光如此遠大，小弟當然同佢一拍即合。
除咗一個強勁嘅「序」由可正兄（《男人唔可以窮》作者，佢大哥本書有幾勁？各位大可Google 一下，差不多霸佔香港所有銷量榜！）新寫外，此小說封面更得到知名畫家陳順康老師繪畫，實在令小弟感到榮幸。陳老師於九十年代已經為本港多本暢銷漫畫繪畫彩稿及封面，而且也有個人作品。近年，陳老師更衝出香港，在美加等地繼續發行作品。早前，小弟參觀陳老師個人畫展，更覺畫藝精進，而且筆觸顯得更有深度。小弟斗膽先同大家分享一下草稿。
當然，我相信最重要嘅係故事，阿賓响2012年唔只經歷感情嘅起伏，更同大家一齊見証咗香港三十幾星期嘅轉變。雖然唔少讀者已經睇過呢個故事，但如果你仍樂意花幾十蚊去支持小弟，或回味當日追過嘅故事，小弟衷心感激。
最後，只要你地唔嫌棄，柏原太賀希望在小說出版後能與各位朋友見一見面。
七月書展，不見不散！
Search